ТЛК «Улан»: ШҚО-дағы стратегиялық инфрақұрылымдық жобаны іске асыру басталды

Шығыс Қазақстан облысында «Улан» көлік-логистикалық кешенінің уақыт капсуласын салу рәсімі өтіп, жобаны іс жүзінде іске асыру басталды.

Іс-шараға Шығыс Қазақстан облысының әкімі Нұрымбет Сақтағанов пен «Dosjan temir joly» АҚ Басқарма төрағасы Нұрлан Сақ қатысты.

Жоба «DTJ Commerce» ЖШС тарапынан «Dosjan temir joly» АҚ қатысуымен жүзеге асырылуда және Жалпыұлттық инвестициялық жобалар пулы мен Инвесторлар тізіліміне енгізілген.

Кешен Ұлан ауданында Алматы — Өскемен республикалық автожолы мен Шар — Өскемен теміржол желісінің қиылысында, жоспарланып отырған ЖЭО маңында орналасады. Мұндай орналасу логистикалық бағыттарды оңтайландыруға және жүк көліктерінің қалаға кіруін болдырмауға мүмкіндік береді.

Кешеннің жалпы аумағы 18 гектарды құрайды. Жоба кезең-кезеңімен іске асырылады. Бірінші кезеңде (2026–2027 жылдар) жылына 423 мың тонна жүк өңдеуге қауқарлы контейнерлік терминалды іске қосу, бір мезетте 28 вагонға дейін қабылдай алатын 4 км-ден астам теміржол жолдарын салу, сондай-ақ ауданы 12 мың шаршы метрден асатын кедендік аймақ құру көзделген.

Екінші кезеңде (2028–2029 жылдар) мультитемпературалық режимдері бар «А» класты қоймалар мен ауыл шаруашылығы өнімдерін сақтауға арналған нысандарды қоса алғанда, қойма инфрақұрылымын дамыту жоспарланып отыр.

Жалпы алғанда, кешеннің қуаттылығы жылына 895 мың тоннаға дейін жүк өңдеуге және жыл сайын 32 мың контейнерді қабылдауға мүмкіндік береді.

Жобаны іске асыру өңірдің көлік-логистикалық инфрақұрылымын дамытуға, оның транзиттік және экспорттық әлеуетін арттыруға, сондай-ақ инвестициялар тарту мен бизнесті дамытуға жағдай жасауға бағытталған.