Шығыс Қазақстан облысының әкімі Нұрымбет Сақтағанов «Dosjan temir joly» АҚ Басқарма Төрағасы Сақ Нұрланмен жұмыс кездесуін өткізді.

Кездесудің негізгі тақырыбы жалпыұлттық пул мен инвесторлар тізіліміне енгізілген «Ұлан» көлік-логистикалық кешені жобасын ілгерілету болды.

Бүгінгі таңда жобаның жобалық-сметалық құжаттамасы толық әзірленіп, мемлекеттік сараптаманың оң қорытындысы алынған. Құрылыс-монтаж жұмыстары 2026 жылғы мамыр айына жоспарланған.

Кездесу барысында тараптар жобаны іске асырудың практикалық мәселелерін талқылады. Атап айтқанда, нысанды инженерлік инфрақұрылыммен қамтамасыз ету, қуаттылықты кеңейту үшін қосымша жер учаскелерін бөлу, сондай-ақ теміржол саласы қызметкерлеріне қолайлы жағдай жасау мәселелері қаралды.

«Осы кезеңдегі негізгі міндет – жобаны іске асыру мерзімдерін сақтау және барлық ұйымдастырушылық мәселелерді сапалы пысықтау», – деп атап өтті облыс әкімі.

«Ұлан» көлік-логистикалық кешені жобасы Шығыс Қазақстан облысының инфрақұрылымдық дамуы үшін стратегиялық маңызы бар жобалардың бірі болып табылады. Жоба өңір халқы мен бизнес үшін тұтыну тауарларын жеткізуді қамтамасыз етуде маңызды рөл атқарады.